Gloomy Winter's Now Awa'

Melody - "Lord Balgonie's Favourite"

Robert Tannahill, 1808

Gloomy winter's now awa',
Saft the westlan' breezes blaw,
'Mang the birks o' Stanley shaw
The mavis sings fu' cheery, O;
Sweet the crawflower's early bell
Decks Gleniffer's dewy dell,
Blooming like thy bonnie sel',
My young, my artless deary, O
Come, my lassie, let us stray
O'er Glenkilloch's sunny brae,
Blithely spend the gowden day
'Midst joys that never weary, O.
2. Towering o'er the Newton woods,
Lav'rocks fan the snaw-white clouds,
Siller saughs, wi' downy buds,
Adorn the banks sae briery, O;
Round the sylvan fairy nooks,
Feathery breckans fringe the rocks,
'Neath the brae the burnie jouks,
And ilka thing is cheery, O;
Trees may bud, and birds may sing
Flowers may bloom, and verdure spring,
Joy to me they canna' bring,
Unless wi' thee, my dearie, O.

The melody is from Nathaniel Gow's collection, and was arranged for this song by R.A. Smith, 1808. Authorship of the melody is also claimed by Alexander Campbell, in Albyn's Anthology, Volume 1.

| Scottish Songs Index | Home Page Robokopp |Home Page Musica|